అప్పాజీపల్లిలో ఘనంగా మత్తడి పోచమ్మ, దుర్గమ్మలకు ఆషాఢ మాస బోనాలు
కొల్చారం, ఆగస్టు 09:
మెదక్ జిల్లా కొల్చారం మండలం అప్పాజీపల్లి గ్రామంలో ఆషాఢ మాసాన్ని పురస్కరించుకుని మత్తడి పోచమ్మ, దుర్గమ్మ అమ్మవార్లకు ముదిరాజ్ సంఘం ఆధ్వర్యంలో బోనాల వేడుకలను భక్తిశ్రద్ధలతో ఘనంగా నిర్వహించారు.
ఈ సందర్భంగా మహిళలు సంప్రదాయబద్ధంగా బోనాలు సమర్పించి అమ్మవార్లను దర్శించుకుని ప్రత్యేక పూజలు నిర్వహించారు. గ్రామ వీధుల్లో నిర్వహించిన బోనాల ఊరేగింపులో డప్పు వాయిద్యాల సందడి, భక్తుల జైజైధ్వానాలతో ఆధ్యాత్మిక వాతావరణం నెలకొంది.
వేడుకల్లో ముదిరాజ్ సంఘం నాయకులు, గ్రామ పెద్దలు, యువకులు, మహిళలు పెద్ద సంఖ్యలో పాల్గొని అమ్మవార్ల ఆశీస్సులు పొందారు. గ్రామంలో సుఖశాంతులు నెలకొనాలని, సమృద్ధిగా వర్షాలు కురిసి పాడిపంటలు బాగా పండాలని, ప్రజలందరూ ఆయురారోగ్యాలతో ఉండాలని ప్రత్యేక ప్రార్థనలు చేశారు.
ఈ సందర్భంగా నిర్వాహకులు మాట్లాడుతూ గ్రామ సంప్రదాయాలు, ఆచారాలను పరిరక్షిస్తూ ప్రతి సంవత్సరం బోనాల వేడుకలను మరింత వైభవంగా నిర్వహిస్తామని తెలిపారు.
– తెలుగు ట్రెండ్స్
