ఎల్‌-నినో ప్రభావంతో రైతులు, పాడి–పౌల్ట్రీ రైతులకు కష్టాలు
పంటలు ఎండిపోతూ.. పశువులకు నీరు, మేత కొరత
చిలిపిచెడ్, అక్టోబర్ 11 (తెలుగు ట్రెండ్ న్యూస్):
ఎల్‌-నినో ప్రభావంతో వర్షాల కొరత, అధిక ఉష్ణోగ్రతల కారణంగా ఉమ్మడి మెదక్ జిల్లా వ్యాప్తంగా రైతులు, పాడి, పౌల్ట్రీ రైతులు తీవ్ర ఇబ్బందులు ఎదుర్కొంటున్నారని రైతు సంఘాలు ఆవేదన వ్యక్తం చేస్తున్నాయి. సకాలంలో వర్షాలు కురవకపోవడం, భూగర్భ జలాలు తగ్గిపోవడంతో వరి, మొక్కజొన్న, పత్తి, కూరగాయల పంటలు ఎండిపోతున్నాయని పేర్కొన్నాయి.
గ్రామాల్లో చెరువులు, కుంటల్లో నీరు తగ్గిపోవడంతో పశువులకు తాగునీరు, పశుగ్రాసం కొరత ఏర్పడిందని రైతులు ఆందోళన వ్యక్తం చేస్తున్నారు. తీవ్ర ఎండలతో పశువులు అనారోగ్యానికి గురవుతున్నాయని, మేత, దాణా ధరలు పెరగడంతో పాడి రైతులపై ఆర్థిక భారం పెరుగుతోందని తెలిపారు. పాల దిగుబడి తగ్గడం వల్ల ఆదాయం పడిపోయి నష్టాలను ఎదుర్కొంటున్నారని పేర్కొన్నారు.
మరోవైపు అధిక ఉష్ణోగ్రతల కారణంగా పౌల్ట్రీ ఫారాల నిర్వహణ ఖర్చులు పెరుగుతున్నాయని, కోళ్ల ఆరోగ్యంపై ప్రతికూల ప్రభావం పడటంతో పాటు గుడ్ల ఉత్పత్తి తగ్గుతోందని పౌల్ట్రీ నిర్వాహకులు ఆందోళన చెందుతున్నారు. కూలింగ్‌ ఏర్పాట్లు, విద్యుత్‌ బిల్లుల భారం కూడా పెరుగుతోందని చెబుతున్నారు.
ప్రభుత్వం ఆదుకోవాలని విజ్ఞప్తి
ప్రస్తుత పరిస్థితులను దృష్టిలో ఉంచుకుని ప్రభుత్వం స్పందించాలని రైతు, పాడి, పౌల్ట్రీ సంఘాలు కోరుతున్నాయి. పంట నష్టాలను అంచనా వేసి అర్హులైన రైతులకు నష్టపరిహారం అందించాలని, ప్రతి మండలంలో పశువుల కోసం తాగునీటి తొట్లు, పశుగ్రాస కేంద్రాలు ఏర్పాటు చేయాలని విజ్ఞప్తి చేస్తున్నాయి. పాడి, పౌల్ట్రీ రైతులకు విద్యుత్‌ సబ్సిడీతో పాటు ఆర్థిక సహాయం అందించి ఆదుకోవాలని కోరుతున్నాయి.
