మెదక్, జూలై 3: తెలంగాణ రాష్ట్ర డీజీపీ రాష్ట్రవ్యాప్తంగా పోలీసు అధికారులతో శుక్రవారం వీడియో కాన్ఫరెన్స్ నిర్వహించి పలు కీలక అంశాలపై సమీక్ష నిర్వహించారు. మెదక్ జిల్లా పోలీసు కార్యాలయం నుంచి జిల్లా ఎస్పీ పాల్గొన్నారు.
ఈ సందర్భంగా కేసుల దర్యాప్తు పురోగతి, కేసుల ఆన్‌లైన్ నమోదు, సీసీటీవీ కమాండ్ అండ్ కంట్రోల్ సెంటర్ నిర్వహణ, ఈ-సాక్ష్య (e-Sakshya) పోర్టల్ వినియోగం, ఇంటి వద్ద నుంచే కేసుల నమోదు, డయల్-100 ఫిర్యాదులపై తక్షణ స్పందన, ప్రజలకు అందిస్తున్న పోలీసు సేవలు, కోర్టు అధికారులతో సమన్వయం తదితర అంశాలపై డీజీపీ సమీక్షించారు.
సాంకేతిక పరిజ్ఞానాన్ని సద్వినియోగం చేసుకుని ఆధునిక పోలీసింగ్‌ను మరింత బలోపేతం చేయాలని డీజీపీ సూచించారు. కేసుల దర్యాప్తులో ప్రతి పురోగతిని వెంటనే ఆన్‌లైన్‌లో నమోదు చేయాలని, పెండింగ్ కేసులు లేకుండా వేగంగా దర్యాప్తు పూర్తి చేయాలని ఆదేశించారు. ప్రజలకు పారదర్శకమైన, వేగవంతమైన పోలీసు సేవలు అందిస్తూ డయల్-100కు వచ్చే ప్రతి ఫిర్యాదుపై తక్షణమే స్పందించాలని సూచించారు.
ఈ సందర్భంగా జిల్లా ఎస్పీ డి.వి. శ్రీనివాసరావు మాట్లాడుతూ, ఈ ఏడాది ఇప్పటివరకు మెదక్ జిల్లాలో 14 కేసుల్లో నేరస్థులకు శిక్షలు పడేలా చర్యలు తీసుకున్నట్లు తెలిపారు. ముఖ్యంగా పోలీస్ స్టేషన్ పరిధిలో జరిగిన మహిళ హత్య కేసులో నిందితుడికి జీవిత ఖైదు విధించిన కేసును డీజీపీ ప్రత్యేకంగా సమీక్షించారు.
హత్య కేసులో సాక్ష్యాధారాలను శాస్త్రీయంగా సేకరించడం, సాక్షుల వాంగ్మూలాలను పకడ్బందీగా నమోదు చేయడం, కోర్టు విచారణకు సమర్థంగా సిద్ధం చేయడం వల్లే నిందితుడికి జీవిత ఖైదు శిక్ష పడేలా చేయగలిగామని అధికారులు వివరించారు. ఈ కేసును విజయవంతంగా దర్యాప్తు చేసి నిందితుడికి శిక్ష పడేలా కృషి చేసిన దర్యాప్తు అధికారులను డీజీపీ అభినందించారు.
