పర్యావరణ పరిరక్షణకు ప్రతి ఒక్కరూ మొక్కలు నాటాలి: కలెక్టర్ ప్రతిమా సింగ్
పచ్చదనం పెంపొందించి పర్యావరణ సమతుల్యతను కాపాడాలి.. నాటిన మొక్కలను సంరక్షించాలి
తెలుగు ట్రెండ్స్ – మెదక్, ఆగస్టు 25:
పర్యావరణ పరిరక్షణకు ప్రతి ఒక్కరూ మొక్కలు నాటాలని, పచ్చదనాన్ని పెంపొందించి పర్యావరణ సమతుల్యతను కాపాడేందుకు కృషి చేయాలని మెదక్ జిల్లా కలెక్టర్ ప్రతిమా సింగ్ పిలుపునిచ్చారు. మొక్కల పెంపకంతో పచ్చని భవిష్యత్తుకు బాటలు వేయవచ్చని ఆమె తెలిపారు.
వన మహోత్సవం సందర్భంగా మంగళవారం మెదక్ జిల్లా కేంద్రంలోని మహిళా డిగ్రీ కళాశాల ఆవరణలో డీఎఫ్‌ఓతో పాటు కళాశాల అధ్యాపకులు, విద్యార్థినులతో కలిసి కలెక్టర్ ప్రతిమా సింగ్ మొక్కలు నాటారు. ఈ సందర్భంగా పర్యావరణ పరిరక్షణ, మొక్కల సంరక్షణపై విద్యార్థులకు అవగాహన కల్పించారు.
కలెక్టర్ మాట్లాడుతూ.. మెదక్ జిల్లాలో వన మహోత్సవం కింద మొత్తం 31 లక్షల 95 వేల మొక్కలు నాటాలని లక్ష్యంగా నిర్దేశించుకున్నట్లు తెలిపారు. ఇప్పటివరకు 19 లక్షల 43 వేల 654 మొక్కలు నాటి 60.83 శాతం లక్ష్యాన్ని సాధించినట్లు వెల్లడించారు.
పర్యావరణ పరిరక్షణలో మొక్కలు, అడవులు అత్యంత కీలక పాత్ర పోషిస్తాయని కలెక్టర్ పేర్కొన్నారు. పెరుగుతున్న కాలుష్యాన్ని నియంత్రించడంతో పాటు వాతావరణ సమతుల్యతను కాపాడేందుకు పచ్చదనాన్ని మరింత విస్తరించాల్సిన అవసరం ఉందన్నారు.
వన మహోత్సవాన్ని కేవలం మొక్కలు నాటే కార్యక్రమంగా కాకుండా.. ప్రకృతిని పరిరక్షించే సామాజిక బాధ్యతగా ప్రతి ఒక్కరూ భావించాలని సూచించారు. ప్రతి కుటుంబం, విద్యార్థి, యువత మొక్కలు నాటడంతో పాటు వాటిని సంరక్షించే బాధ్యతను కూడా తీసుకోవాలని కోరారు.
భావితరాలకు స్వచ్ఛమైన గాలి, ఆరోగ్యకరమైన వాతావరణాన్ని అందించాలంటే మొక్కలు నాటి వాటిని వృక్షాలుగా ఎదిగే వరకు కాపాడాలని కలెక్టర్ పిలుపునిచ్చారు. నాటిన ప్రతి మొక్కను సంరక్షించినప్పుడే వన మహోత్సవం లక్ష్యం పూర్తిస్థాయిలో నెరవేరుతుందని తెలిపారు.
పచ్చదనం పెంపొందించడం ద్వారా పర్యావరణ సమతుల్యతను కాపాడటంతో పాటు ప్రజల ఆరోగ్యాన్ని మెరుగుపరచవచ్చని కలెక్టర్ పేర్కొన్నారు. జిల్లాలో చేపడుతున్న మొక్కల పెంపకం కార్యక్రమాన్ని విజయవంతం చేసేందుకు అన్ని వర్గాల ప్రజలు భాగస్వాములు కావాలని కోరారు.
ఈ కార్యక్రమంలో డిగ్రీ కళాశాల ఇన్‌చార్జి ప్రిన్సిపల్ ప్రవీణ్ కుమార్, కళాశాల అధ్యాపకులు, విద్యార్థినులు, అటవీ శాఖ అధికారులు, సంబంధిత శాఖల అధికారులు తదితరులు పాల్గొన్నారు.
