విద్యుత్ అమరవీరుల స్ఫూర్తితో పోరాడుదాం
నూతన విద్యుత్ సవరణ చట్టానికి వ్యతిరేకంగా ఉద్యమించాలి: సీపీఎం జిల్లా కార్యదర్శి కె. నర్సమ్మ
కొల్చారం, ఆగస్టు 28 (నవ పలుకులు): బషీర్బాగ్ విద్యుత్ పోరాట అమరవీరుల స్ఫూర్తితో కేంద్ర ప్రభుత్వం తీసుకొస్తున్న నూతన విద్యుత్ సవరణ చట్టానికి వ్యతిరేకంగా ప్రజలు ఉద్యమించాలని సీపీఎం జిల్లా కార్యదర్శి కె. నర్సమ్మ పిలుపునిచ్చారు. విద్యుత్ అమరవీరుల స్మారక దినం సందర్భంగా శుక్రవారం కొల్చారం మండల కేంద్రంలో అమరవీరులకు నివాళులర్పించారు.
2000 ఆగస్టు 28న హైదరాబాద్లోని బషీర్బాగ్లో విద్యుత్ చార్జీల పెంపు, విద్యుత్ సంస్కరణలకు వ్యతిరేకంగా జరిగిన పోరాటంలో అమరులైన బాలస్వామి, విష్ణువర్ధన్రెడ్డి, రామకృష్ణలను స్మరించుకుంటూ వారి చిత్రపటాలకు పూలమాలలు వేసి నివాళులర్పించారు.
ఈ సందర్భంగా నర్సమ్మ మాట్లాడుతూ.. బషీర్బాగ్ విద్యుత్ పోరాటంలో అమరులైన ముగ్గురి త్యాగాలు వృథా కాలేదన్నారు. విద్యుత్ చార్జీల పెంపు, ప్రజలపై భారాలకు వ్యతిరేకంగా నాటి పోరాటం ఫలితంగానే ప్రభుత్వాలు విద్యుత్ చార్జీలు పెంచే విషయంలో వెనుకడుగు వేయాల్సి వచ్చిందని తెలిపారు.
విద్యుత్ ప్రైవేటీకరణ, సంస్కరణలకు వ్యతిరేకంగా 2000లో వామపక్షాల ఆధ్వర్యంలో పెద్ద ఎత్తున ఉద్యమం జరిగిందని గుర్తు చేశారు. ఆ సమయంలో జరిగిన కాల్పుల్లో బాలస్వామి, విష్ణువర్ధన్రెడ్డి, రామకృష్ణలు ప్రాణాలు కోల్పోయారని తెలిపారు. వారి పోరాటాల ఫలితంగానే నేడు రైతులకు ఉచిత విద్యుత్, గృహ వినియోగదారులకు 200 యూనిట్ల వరకు ఉచిత విద్యుత్ వంటి పథకాలు అమలవుతున్నాయని అన్నారు.
ప్రస్తుతం కేంద్రంలోని బీజేపీ ప్రభుత్వం తీసుకొచ్చిన నూతన విద్యుత్ సవరణ చట్టం వల్ల మరోసారి ప్రజలపై విద్యుత్ భారాలు పడే ప్రమాదం ఉందని నర్సమ్మ విమర్శించారు. రైతుల వ్యవసాయ మోటార్లకు స్మార్ట్ మీటర్లు ఏర్పాటు చేయడం ద్వారా ఉచిత విద్యుత్ నుంచి రైతులను దూరం చేసే ప్రయత్నాలు జరుగుతున్నాయని ఆరోపించారు.
విద్యుత్ రంగాన్ని ప్రైవేటు సంస్థలకు అప్పగించడం వల్ల సామాన్య ప్రజలు, రైతులపై అదనపు భారం పడే అవకాశం ఉందని అన్నారు. కేంద్ర, రాష్ట్ర ప్రభుత్వాలు అమలు చేయాలని చూస్తున్న విద్యుత్ సంస్కరణలు, ప్రైవేటీకరణ విధానాలను ప్రజలు ఐక్యంగా ఎదుర్కోవాలని పిలుపునిచ్చారు.
ఈ కార్యక్రమంలో ఫాతిమా, లక్ష్మి, వీరమణి, నర్సింలు, పోచయ్య, మహేశ్వరి, శ్రీనివాస్ తదితరులు పాల్గొన్నారు.
నవ పలుకులు – కొల్చారం
కామెంట్ను పోస్ట్ చేయండి